Tilsette i Meråker kommune får automatisk eit tillegg i årsløna på 20.000 kroner når dei tar ei vidareutdanning. Det gjeld både fagarbeidarar og høgskoleutdanna personell. Dei som tar vidareutdanning i tråd med kompetanseplanen i kommunen, får også stipend som skal dekkje ein del av utgiftene til reising og materiell.

– Verdien av vidareutdanning er kjempestor, meiner Elisabeth Johansen, konstituert sektorsjef for helse, pleie og omsorg. Ho seier kommunen står framfor store utfordringar som krev høgare kompetanse.

– Vi legg difor til rette både for vidareutdanning og etterutdanning i form av kortare kurs, seier ho.

Sektorsjefen opplyser at mange tilsette har vore gjennom Demensomsorgens ABC.

– Eg håper at det kurset kan fungere som ein port til vidareutdanning i demensomsorg. Og kanskje kjem vidareutdanning i demensomsorg på fagskolen inn i kompetanseplanen, seier ho.

Alle som er medlem av Fagforbundet, får dekt opptil 50 prosent av eigne utgifter i samband med vidare- og etterutdanning.