Karin E. Svendsen, Fagbladet

karin.svendsen@fagforbundet.no

Sjukepleiar nr. 250 i Hordaland er Beate Solberg frå Stord.

– Det var moro at ho kjem frå Stord/Fitjar. Der har dei tillitsvalde arbeidd særs godt, meiner Sigrun Bøe Perez, leiar i Fagforbundet Seksjon helse og sosial i Hordaland.

Reiser ut saman

Grunnen til at Hordaland har fått eit sig av nye sjukepleiarar, er ifylgje Sigrun Bøe Perez at fylket har eit godt samarbeid med lokallaga.

– Alle me fire seksjonsleiarane i fylket er samde om å reise ut saman. Då har me stand og arbeidsplassbesøk saman med seksjonane lokalt.

Ein annan grunn til at tilsette vel Fagforbundet, meiner ho er dei yrkesfaglege tilboda sentralt, i fylket og i lokallaga.

Gode tillitsvalde

Anne Britt Sigveland, seksjonsleiar i Stord/Fitjar, legg óg vekt på at forbundet vert synleg når dei reiser rundt på arbeidsplassane. Og det gjer dei heile døgeret, og alle dagar. Også nattevaktene får besøk.

– Når folk veit kven me er og kor me kan treffast, kjem dei til oss. Og dei som treng det, får hjelp med ein gong, seier ho. Mellom dei som har kome til fagforbundet i kommunane Stord og Fitjar, er 30 sjukepleiarar.

– Men den viktigaste grunnen til at sjukepleiarar og andre melder seg inn, er nok at me har gode tillitsvalde på mange arbeidsplassar, trur Sigveland.