ØYSTEIN WINDSTAD

oystein.windstad@fagbladet.no

Mannen var tiltalt for seksuelle overgrep mot sin eigen fosterson. Fostersonen som skulle vitne med skuldingane om overgrep, tok livet sitt kort tid før rettssaka skulle starte.

Politiet hadde ikkje lenger noko vitne, og mannen blei frikjent for overgrepa. Mannen i 30-åra har jobba i barnevernet i mange år. Han har vore styreleiar og eigar av barnevernsinstitusjonar og selskap som driv med formidling av fosterheimar. No skal Borgarting lagmannsrett i Oslo ta stilling til om han har prøvd å kjøpe seg fri frå skuldingane.

• Tiltalt for overgrep, bestikkingar og motarbeiding av retten

Fagbladet oppdaga at barnevernet ikkje visste

Ifølgje Proff.no eig mannen i dag eit selskap, som igjen eig hundre prosent av to selskap som driv med barnevern. Barne-, ungdoms- og familieetaten (Bufetat) kjøpte tenester for fleire millionar av eit av selskapa hans, utan at dei viste om at han var tiltalt for seksuelle overgrep mot fostersonen.

Det var etter at Fagbladet tok kontakt med Bufetat at barnevernsmyndigheitene blei klar over tiltalen og fekk han tilsendt. Dette er omtalt i VG sin podkast og nettdokumentar om saka. Bufetat har sagt at mannen bevisst har villeia dei. Mannen avviser dette og alle skuldingane, gjennom advokaten sin.

Skal ha tilbode 200.000 for å trekke saka

Den nye rettssaka mot mannen i 30-åra, som bur i Oslo starta tysdag 23. august. Ho skal etter planen vere ferdig 30. august. Barneverns-eigaren skal ha oppsøkt broren til fostersonen sin. Ifølge tiltalen skal han ha tilbode dei to brørne 100.000 kroner kvar, mot at dei droppa skuldingane om overgrep og forandra vitneforklaringane. I tillegg er han tiltala for å ha brote besøksforbodet han fekk av politiet. Besøket og forsøket på å få skuldingane droppa skal ha skjedd i februar 2019, kort tid etter at den opphavlege tiltalen for overgrep kom. Mannen fekk besøksforbodet i mars 2018.

• Grunnen til at omsorgsarbeidarar har høgast sjukefråvær

Avviser alt

Heile saka mot mannen var i ferd med å bli droppa. Politiet har fått kritikk for manglande etterforsking, men anka frifinninga etter at VG fekk tak i ny informasjon som blir brukt som bevis i skuldingane om bestikkingar.

Fagbladet var først ute med å omtale tiltalen og skuldingane mot mannen. Seinare har VG følgt opp saka. Det har ført til at fleire kommunar har sagt opp kontraktane med selskapa til mannen. Forsvarar Thomas Randby i Advokatfirmaet Elden skriv i ei melding at mannen avviser alle skuldingane:

– Tysdag starta ankeforhandling over seks dagar som gjeld tilleggstiltalen om eit angjeveleg pengetilbod. Min klient blei fullt ut frikjent i tingretten og erkjenner ikkje straffeskuld.