ØYSTEIN WINDSTAD

oystein.windstad@fagbladet.no

– Forhandlingane stoppa på grunn av heilheita. Vi er ueinige med tanke på ansiennitet og økonomi. Vi kjente at dette fekk vi ikkje til og då ender me i brot. Då får vi tid til å tenkje og møtes hos meklaren. Vi veit ikkje eksakt når meklinga startar, men det blir i første halvdel av januar, seier Fagforbundet sin forhandlingsleiar Anne Green Nilsen. Rundt 2000 medlemmer i FO og Fagforbundet er omfatta av forhandlingane som går til mekling.

• Slik ville Høgre og Frp brukt pengane om dei hadde styrt

Truleg mekling etter nyttår

FO og Fagforbundet har samarbeida i forhandlingar med NHO om løna til dei som jobbar innan alt frå barnevern, omsorgsbustadar til Kirkens Bymisjon. Måndag kveld blei det klart at partane ikkje greidde å bli einige, fire timar før fristen var ute. Lønsoppgjeret går vidare til mekling. Det er venta at meklinga startar etter nyttår.

Forhandlingane i 2020–2021 enda med eit breitt streikeuttak: Her streika dei i privat omsorg i fjor.

Kan bli streik i privat omsorg

Avtalen det dreier seg om heiter Overenskomst 453 og omfattar blant andre tilsette i private omsorgsinsitusjonar som Stendi AS, Human Care AS, Aberia og Olivia Solhaugen AS – men og mellom anna Blindeforbundet, Bymisjonen og enkelte barnehagar. Både Fagforbundet og FO startar no arbeidet med å førebu streikeuttak.

– Streik er fagrørslas mektigaste verktøy. Vi er klare, sjølv om vi sjølvsagt håpar på å bli einige i mekling, seier FO-forhandlingsleiar Ole Henrik Kråkenes til Fri Fagbevegelse.