ØYSTEIN WINDSTAD

oystein.windstad@fagbladet.no

Saman med teamet av Fagforbundet-advokatar har Kjetil Edvardsen vunne over ei rekkje kommersielle velferdsselskap. Fleire av sakene har han vunne i Høgsterett.

Sigrane har blant anna betydd slutten for at tusenvis av omsorgsarbeidarar har blitt leigd inn som konsulentar. No har dei i prinsippet krav på fast jobb.

Ein gjennomgang av sakene han har vunne nyleg og som er offentleg kjent har ført til at omsorgsarbeidarar har fått 93 millionar kroner i erstatning og etterbetaling.

Den største saka til no er sigeren over leiinga i konsernet Stendi som har 5000 tilsette.

I februar hengde han frå seg den svarte kappa frå retten og starta som statssekretær i Barne- og familiedepartementet.

NY HATT: Edvardsen seier han tek med seg erfaringane frå Fagforbundet. Og at han har fått ein "ny hatt": -Min jobb er å føre regjeringa sin politikk på området. Tidlegare hadde eg som oppdrag å vere advokat for medlemmer i Fagforbundet. Det er annaleis no og eit rolleskifte som eg må forhalde meg til. 

Øystein Windstad

– Kjenner verkelegheita

Edvardsen har jobba i nesten 30 år som advokat. Han fortel kunnskapen han har fått frå mange rundar i retten med selskap innan blant anna kommersielt barnevern har gjeve han innsikt i korleis ting faktisk fungerer:

– Sakene eg har jobba med, har først og fremst gjeve meg eit godt innsyn i verkelegheita. Korleis det fungerer ute i verksemdene. Både på godt og vondt. Nokre av dei har etter kvart blitt relativt profesjonelle, medan andre har litt igjen der.

– Kva tenkjer du om kommersiell versus offentleg velferd?

– Det har kome ei realitetsorientering når det gjeld barnevernet. Korleis ein skal jobbe og i kva grad ein skal samarbeide med dei private og kommersielle selskapa. Politikken er jo først og fremst å bygge opp det statlege tilbodet. Og så ha ei fornuftig haldning til den balansen. Detaljane i det kan eg ikkje seie så mykje meir om, seier statssekretær Edvardsen.

• LO vil at dei med lågast løn skal få meir i lønsoppgjeret.

INNFLYTELSE: Edvardsen med ein kollega i Akersgata 59. Statssekretærar er regna som ein slags viseminister og er rekna for å ha ein del påverknad på det politiske arbeidet til ei regjering.

Øystein Windstad

Ny rolle

Edvardsen er leiar av Færder Arbeidarparti og har tidlegare sitte i kommunestyret i mange år. Han seier dette om den nye rolla:

– Det aller viktigaste oppdraget her er barn og unge sin trygge oppvekst. Då er det særleg fokus på barnevern. Og også det førebyggande med familievern og fosterheimar og alt rundt det. Det er veldig viktig for både meg og sjefen min, statsråden, dette med trygg digital oppvekst for barn. Det er eit tema som eg trur mange skjønar er nødvendig å sjå på, seier han.

Han legg til at innhaldet i politikken allereie er godt spikra.

– Kort samanfatta er jobben min å gjennomføre Arbeidarpartiets politikk på området. Og sørge for at vi får til dét best mogleg.

• BPA-streiken: Full siger.

Frå møter med minister til stortingspolitikarar

Jobben som statssekretær er å støtte barne- og familieminister Lene Vågslid (Ap).

SJEFEN: Kjetil Edvardsens næraste leiar er no barne- og familieminister Lene Vågslid (Ap), her saman med ein av dei andre nykomarane i Støre-regjeringa.

Amanda Pedersen Giske / NTB

Han vil også bli godt kjent med stortingspolitikarane:

– Som statssekretær jobbar eg i ei regjering for å få til regjeringa sitt prosjekt. Det inneber mykje samarbeid med Stortinget og politikarane der. Og få saker gjennom. Den andre delen av det er at ein er i leiinga av eit departement som har mange forskjellige oppgåver.

– Mange av dei synest ikkje i det daglege, men det er eit stort byråkrati som saksbehandlar og utnemner og driv med budsjett og held på. Så kan ein prøve å legge sine politiske fargar på det arbeidet der det er riktig, og andre stader berre vere leiinga i eit departement, seier Edvardsen.

Han har jobben som statssekretær i utgangspunktet fram til stortingsvalet i september. Kva som skjer etter valet, også om Ap fortset i regjering, er ifølgje han heilt opent.

• Helsearbeidarar kan ikkje filmast på jobb utan samtykke.

– Audmjuk

Før Edvardsen tok jobben, lova han å fortsette å vere den han er:

– Eg skal ikkje bli annleis sjølv om eg blir ein del av den politiske leiinga i departementet. Eg er meg sjølv og det har eg tenkt å fortsette med. Eg trur at når dei vel ein 57-åring snart, som ikkje har denne erfaringa frå før, så må det vere fordi eg har noko anna.

– Og det andre trur eg er kontakt med verda rundt, sektoren, barna, ungdommane, lokalsamfunn og livet. Det har eg tenkt å halde fast i. Eg tek med og skal bruke mine erfaringar. Eg skal også berre prøve å forstå rollene og vere audmjuk. Og ikkje tru at ein er meir enn ein er i eit stort system med mykje flinke folk, seier den ferske statssekretæren.