ØYSTEIN WINDSTAD

oystein.windstad@fagbladet.no

Sidan 2. november har Fagforbundet, FO og YS teke ut medlemmer som jobbar i privat omsorg, i streik.

Ein av dei som tok ordet under markeringa, var Halvor Gaustadnes, interessepolitisk sekretær i Blindeforbundet.

– Dette er eit viktig område, og vi har ingen planar om å gje oss med streiken. Samstundes håpar vi at partane snakkar saman og finn fram til ei løysing alle kan leve med, sa Gaustadnes, som har vore medlem i Fagforbundet i 20 år.

Han understreka under støttedemonstrasjonen og fanemarkeringa at hovudårsaka til streiken er å løfte lønsnivået for dei lågaste løna som jobbar i privat omsorg.

TO VEKER: Halvor Gaustadnes har streika i to veker og seier dei er klare for meir om dei må. Han har vore medlem i Fagforbundet i 20 år og heldt apell på fanemarkeringa for streiken i NHO 453.

Øystein Windstad

• Varslar opptrapping av streiken.

Tener 50.000 mindre enn i kommunen

Odd Hallgeir Larsen, nestleiar i Fagforbundet, peikar på at dei som er nye i arbeidslivet og jobbar i privat sektor, tener mindre enn dei som hadde jobba i kommunen.

– Ein fagarbeidar utan ansiennitet som jobbar i NHO-sektoren, tener 49.000 kroner mindre i året enn i kommunen. Det er denne lønsprofilen vi ønskjer å løfte. Vi har ein avtale med NHO om å jamne ut forskjellane, seier Larsen.

– Dette seier NHO nei til i neste års oppgjer. Hadde vi godteke dette, ville forskjellane vorte endå større. Dette gjeld folk som jobbar i asylmottak, barnevernstenester og andre viktige område, understrekar han.

Sjekk Edith Piaff-sangen som har fått ny drakt og blitt streikesang i videoen under:

– Det kan tenkjast at NHO peikar på at bedriftene slit med høgare straumprisar, renter og dyrtid?

– Slik er situasjonen i heile arbeidslivet, men desse bedriftene er offentleg finansierte. Det er kommunar og staten som betaler desse rekningane. Dyrtida er uansett noko dei lågast løna merkar mest, seier Larsen og legg til:

– Dette handlar om NHO-verksemdene som er opptekne av å halde løningane nede og profitten oppe.

• Streik i privat omsorg

Vil ha utjamning

Håkon Sand jobbar som fotograf og er fersk tillitsvald for Fagforbundet i Frelsesarmeen. Han har vore i streik sidan måndag 4. november.

– Vi streikar for å løfte dei med lågast løn, slik at dei kan kome på ei lik line med andre i arbeidslivet. Det er eit veldig fint samhald, og vi streikar for det same målet, seier Sand.

Han understrekar kor viktig det er å halde saman under streiken.

– Det er viktig at vi står saman, blant anna som streikevakter. Eg håpar dette ikkje dreg ut i tid og at det kjem ei løysing. Dette er jobbar vi alle vil tilbake til, seier han.

Fanemarkeringa fredag var arrangert av Fagforbundet Oslo, Fagforbundet sentralt, Fellesorganisasjonen (FO) og Delta.

• Haakon er fersk tillitsvald og blei teken rett ut i streik.