TORMOD YTREHUS

tormod@lomedia.no

– Dette handlar om fridom og bør engasjere fagrørsla som har lang tradisjon for å kjempe for fridommen til individa og for ein fornuftig balanse mellom familie og jobb, seier leiar Mona Berger i Fellesorganisasjonen (FO) Trøndelag til FriFagbevegelse.

Fagrørsla og LO er sterkt representert på markeringane og deriblant FO i Trondheim.

Nestlederen i Fagforbundet Ung tok abort fordi fosteret var sykt. Det kunne hun ikke gjort hvis abortloven blir endret

Erna Solberg kan endre lova

Grunnen er at Statsminister Erna Solberg har sagt at ho er villig til å forhandle med KrF om endringar i paragraf 2c i abortlova, for å få til eit regjeringssamarbeid.

I den omstridte paragrafen står det at ein kan ta abort etter tolvte veke «når det er stor fare for at barnet kan få alvorlig sykdom, som følge av arvelige anlegg, sykdom eller skadelige påvirkninger under svangerskapet». I tillegg skal statsministeren vere villig til å forhandle om eit forbod mot tvillingabort.

Veljarane seier derimot blankt nei til at abortlova skal rørast, ifølge ei undersøking Respons Analyse har gjort for VG. 68 prosent av veljarane seier nei til endringar, medan berre 16 prosent vil endre lova.

Kvinnerørsla trur 10.000 personar kjem til å gå ut i gatene 17. november.

Her er alle dei stadfesta demonstrasjonane (klikk på markørane får å sjå tid og stad):

1. desember i år er det akkurat 40 år sidan lova trådde i kraft. I 1978 fekk kvinnerørsla kjempa gjennom retten til sjølvbestemt abort.

Lova seier at kvinnene sjølv kan bestemme om dei skal ta abort fram til tolvte svangerskapsveke. Etter dette kan ei nemnd innvilge abort etter visse kriterie.

Barnepleiar Laila steller barn som er fødde i veke 22. – Dei klamrar seg til livet, seier ho

– Uverdig omgrep

Statsministeren sa førre veke at ho vil forhandle med KrF om å sette «en viktig barriere i utviklingen mot sorteringssamfunnet». Fellesorganisasjonens Mona Berger tek avstand frå omgrepet «sorteringssamfunn».

– Dette omgrepet som høgresida og KrF bruker, teiknar eit bilde av at kvinner og familiar som tek ansvarlege val for seg sjølv og livssituasjonen sin, står ved eit samleband og sorterer bort defekte varer. Det er eit uverdig omgrep på eit ekstremt vanskeleg val som individ står i. Ingen tar lett på det å ta abort, verken før eller etter veke tolv, seier ho.

(Saka held fram under bildet.)

Mona Berger, leiar i Fellesorganisasjonen Trøndelag.

Eirik Dahl Viggen

Berger, som også er førstevara til Stortinget for SV, skal halde appell under demonstrasjonen i Trondheim.

– Kvifor stiller Fellesorganisasjonen opp i ein demonstrasjon mot endringar i abortlova?

– Vi er eit kvinnedominert forbund, der kvinnepolitikk og familiepolitikk står sentralt. Vi kjenner behov for å markere motstand mot endringar i abortlova som vil føre til at gravide kvinner og familiar i ein sårbar situasjon mistar valfridommen sin, seier Berger.

– Dei usosiale kutta som den blå-blå regjeringa har gjennomført, har ikkje gjort det enklare å ha barn med spesielle behov i landet vårt. Heller tvert imot. Det blir då særleg kritikkverdig at dei no vil opne for at fleire kvinner og familiar utan nødvendige ressursar – både mentalt, økonomisk og kjenslemessig – skal vere nøydd til å bere fram alvorlege sjuke barn eller få fleire barn enn kva dei tenker er forsvarleg ut frå livssituasjonen sin, meiner Berger.