ØYSTEIN WINDSTAD

oystein.windstad@fagbladet.no

Nyleg fekk ein tilsett i Lyngdal kommune høyre at han ikkje kunne ha eit prideflagg på kontoret.

Etter det gjekk ein av landets fremste ekspertar på offentleg tilsette sin ytringsfridom ut og sa at prideflagg er heilt greitt.

Lyngdal-ordførar Unni Nilsen Husøy (Frp) står på sitt og seier saka handlar om dette:

– At våre offentlege bygg og kontor skal vere mest mogleg nøytrale. Noko eg i utgangspunktet trudde dei fleste tok som ei sjølvfølge.

• Menneskerett-ekspert: – Kan ikkje nekte prideflagg på kontoret.

YTRING: Er regnbogeflagget ei politisk ytring som er innafor på kontoret? Ja meiner ekspert på ytringsfridom ved Norges institusjon for menneskerettigheter. Nei meiner ordføararen i Lyngdal.

Fredrik Hagen / NTB

– Tilsette og innbyggarar som tok initiativet

Saken er tidlegare omtalt mellom anna i NRK. Husøy seier at det ikkje var ho som fremma forslaget, og at ho støtta ei innstilling frå partssamansett utval:

– Dette er ikkje ei sak eg som ordførar i Lyngdal har funne på. Det var førespurnader frå tilsette og innbyggarar som fekk denne saka til å rulle, seier Husøy.

Ordføraren seier dei etiske retningslinjene er eit ekstra hjelpemiddel for leiarar dersom det skulle oppstå konflikt om kva dei tilsette kan ha på kontoret.

• Dette kan du seie som offentleg tilsett.

Meinar dette om prideflagg på jobb

Husøy seier dette ikkje starta som ein diskusjon om regnbogeflagg:

– At dette blei ein ny pride-debatt, synest eg er svært unødvendig. Det var ikkje kommunen sitt utgangspunkt, seier Lyngdal-ordføraren.

Hun er sjølv ikkje ein tilhengar av prideflagg på jobben.

– Personleg meiner eg at prideflagg også er ei ytring som vi ikkje burde vere avhengige av å vise på jobb. Vi som tilsette skal ha respekt for kvarandre og kvarandre sine meiningar. At prideflagg skal kategoriserast på ein annan måte enn andre verdiar, politiske og religiøse symbol, meiner eg blir feil.

• Undersøkjing: Sju av ti meiner det ikkje er aksept for kritikk av kommunen.

– Prideflagg er politisk

Husøy meiner regnbogeflagget er ei politisk ytring, blant anna fordi nokon viser til at det handlar om menneskerettar å ha eit prideflagg på kontoret sitt, og at det ikkje er politisk.

– Den tida trur eg vi er langt forbi, og prideflagget har absolutt blitt politisk. Dette er berre mi ærlege meining som politikar. Som ordførar forheld eg meg til vedtaket og dei etiske retningslinjene. Der står det ikkje nemnt noko om pride-flagg. Den vurderinga skal takast av nærmaste leiar, seier Lyngdal-ordføraren.

I denne saka intervjua Fagbladet ein av dei fremste ekspertane i landet på ytringsfridom. Han seier at regnbogeflagg er ei politisk ytring, men at flagget samtidig er innafor ytringsfridomen til dei offentleg tilsette.

Men ordføraren står på sitt:

– For min del er det ikkje aktuelt å revurdere vedtaket.

• Over halvparten som jobbar i kommunane veit ikkje om dei kan seie meininga si.

Kor går grensa?

Husøy meiner dei tilsette bør ha fokus på jobb i kommunen og ikkje kva dei står for.

– Kor tenkjer du grensa generelt går med tanke på flagg, plakatar eller andre former for ytringar på offentleg tilsette sine kontor?

– Eg tenkjer at det blir leiarane sitt ansvar å handtere. Personleg meiner eg at eit offentleg kontor skal vere heilt nøytralt, utan noko form for personlege meiningar og ytringar. Tilsette er på jobb, og eg forventar at det er arbeidsoppgåvene som er deira fokus i arbeidstida.