ØYSTEIN WINDSTAD

oystein.windstad@fagbladet.no

Mannen har drive selskap innan barnevern fleire stadar i landet. Måndag blei han dømt til fengsel i to år og to månader for overgrep mot eigen fosterson frå han var mellom 16 og 19 år. I tillegg blei han dømt for overgrep mot ein annan mann som var ute av stand til å samtykke eller motsette seg.

Både den dømte mannen og forsvarar Thomas Randby har avvist alle skuldingane. Det er ikkje kjent om mannen ankar.

 • Tiltalt for overgrep mot sovande mann og fosterson

Erstatning

Mannen i 30-åra eig i dag selskap som driv innan barnevern. Tidlegare har han jobba på fleire barnevernsinstitusjonar og blant anna som innleigd konsulent og saksbehandlar i fleire kommunar.

Dei to meddommarane og fagdommaren trudde ikkje på forklaringane til den tiltalte. Dei la til grunn i domen at han som fosterfar hadde eit spesielt tillitsforhold og ansvar til fostersonen. Og at mannen har utnytta sin posisjon. Oslo tingrett landa på at mannen skal betale 240.000 til dei etterlatne til den eine fornærma. Og 120.000 i oppreisning til den andre.

Fostersonen tok sitt eige liv

Tidlegare blei mannen frikjend av ein delt rett for å ha prøvd å bestikke og betale seg ut av overgrepsskuldingane frå fostersonen.

Fostersonen tok sitt eige liv vinteren 2021, kor tid før den opphavlege rettssaka skulle starte. Den saka blei lagt vekk, men kom seinare opp igjen, etter at politiet blant anna kom i kontakt med andre som fortalde dei hadde opplevd overgrep av mannen.