ØYSTEIN WINDSTAD

oystein.windstad@fagbladet.no

Sakene mot barneverns-gründeren i 30-åra starta med at han blei skulda for seksuelle overgrep mot sin eigen fosterson.

Mannen, som i dag eig to selskap i privat barnevern, blei også skulda for å ha foreslått å betale fostersonen og hans tvillingbror 100.000 kroner kvar for at alle skuldingane om overgrep skulle bli droppa.

• Fostersonen tok sitt eige liv før rettssak

Delt rett

Saka gjekk i Borgarting lagmannsrett i slutten av august og torsdag kom dommen. Alle dommarane var einige om at det har kome eit forslag om at den tidlegare fostersonen og hans tvillingbror skulle få pengar om overgrepsskuldingane blei droppa.

Når eit fleirtal av dommarane landa på frifinning, er det fordi dei meiner det er rimeleg tvil om det var barneverns-gründeren sjølv som kom med forslaget.

To av sju dommarar tok dissens og meinte det var heva over rimeleg tvil at det var den tiltalte som kom med forslaget om til saman 200.000 kroner for å trekkje skuldingane om overgrep. Fleirtalet peika ikkje på kven dei meiner eventuelt har kome med pengeforslaget, men at det er tvil rundt om det var tiltalte eller ikkje.

• Jobba i barnevern samtidig som han var tiltalt for overgrep

BELASTANDE: Thomas Randby er forsvarar til barnevernsgründeren og fortel skuldingane har gått ut over arbeidsmuligheitene til klienten.

Øystein Windstad

Forsvarar: – Svært letta

Thomas Randby i Elden Advokatfirma har forsvart barneverns-gründeren og skriv dette i ein epost om domen:

– Vår klient er svært letta over nok ein gong å ha blitt blankt frifunnen i rettsapparatet (sjå avsnittet under, journ.anm.).

Han er heilt klar på at skuldingane mot han er uriktige. Etter mitt syn er domen riktig. Påtalemyndigheita skal truleg snarleg ta stilling til hovudtilltalen. Vår klient har vore under etterforsking sidan desember 2017 – i snart fem år. Dette har vore ei ekstremt belastande periode. Vi håpar at påtalemyndigheita no set sluttstrek og legg vekk heile saka mot vår klient.

• Nesten 30.000 jobbar i privat barnehage: Dette er grunnen til mogleg streik

Kan bli ny runde om overgrep i retten

VG har laga både ein podkast og nettdokumentar om skuldingane mot den tidlegare fosterfaren. Våren 2021 blei barnevernsgründeren frikjend for skuldingane om overgrep mot fostersonen. Det skjedde etter at den tidlegare fostersonen tok sitt eige liv og påtalemyndigheitene ikkje lenger hadde noko vitne. Politiet har henta inn nye bevis i den påståtte overgrepssaka. Det er no opp til statsadvokaten i Oslo om det blir ein ny tiltale og sak i retten om overgrepsskuldingane.