ØYSTEIN WINDSTAD

oystein.windstad@fagbladet.no

Ein bil rullar inn i ein oppkøyrsel medan grusen knasar i det dekka stoppar. Ei yngre hand finn ei ringeklokke før ei eldre hand opnar ei dør. Det kan bli fleire møte mellom menneske innan helseyrke som heimesjukepleie. Om kunstig intelligens blir brukt på rett og fornuftig vis. Det trur tillitsvalde Yvonne Holmeide:

– KI kan brukast på ein positiv måte i fordeling av arbeidslister. Kor folk sit og fordeler dag for dag. Det kan bli mykje meir effektivt når KI blir brukt. Også når det kjem til kalenderplan kan KI hjelpe veldig fordi det er ein veldig stor administrativ jobb, seier Holmeide som jobbar i heimesjukepleia i Oslo.

TILLITSVALD: Yvonne Holmeide er hovudtillitsvald for i Bydel Frogner i Fagforbundet Oslo. Ho seier at det er viktig å møte KI på jobb med eit ope sinn. Samtidig som fagforeiningane må bli inkludert og teke med på drøfting når KI skal innførast på arbeidsplassane.

Privat

• – Kunnskapsmangel om KI kan gje klasseskilje på jobben

– Meir rettferdig turnus

Ho er også hovudtillitsvald og sit med den vanskelege turnus-kabalen der nokon fort kan bli skuffa:

– Om vi kan bruke KI når turnusen blir lagt, blir det meir rettferdig. Det blir ikkje tankar om at nokon har fått den meir gunstige vakta fordi nokon kjenner kvarandre. Eg trur det blir mindre spørsmål om korfor nokon skal ha det betre enn meg, seier helsefagarbeidar Holmeide og legg til:

– I eksempelvis heimesjukepleie skulle vi hatt fleire ute blant brukarane. Samtidig veit vi at det er mange som sit inne og jobbar med administrasjon. Med KI kan dei sleppe desse planleggingsjobbane og kan heller hjelpe med utfordringane ute, seier Holmeide. Ho var ein av rundt 70 tillitsvalde som deltok nyleg på eit Fagforbundet-seminar om kunstig intelligens på jobben. Og nettopp KI i turnus har no blitt testa ut fleire plassar i landet, blant anna i Gjerdrum kommune og i Alna i Oslo.

• Brukar kunstig intelligens på jobb: Føreser sjukefråvær og fyller vaktplanane

KI har korta ned køar

Ein som følger korleis vi kan bruke KI på jobben tett er IT-ekspert Torgeir Waterhouse. Han var hyra inn til å halde dagskurset om KI for Fagforbundet Oslo sine medlemmer i mars. Waterhouse seier at det er viktig at fagforeiningane får ei hand på rattet når KI skal innførast. Og at KI kan vere til stor hjelp:

– Dette handlar både om å kunne skape ein betre og lettare arbeidskvardag. Det handlar om at ein del typar oppgåver burde bli flytta frå menneske til maskin, for å fristille ressursar og kapasitet vi kan bruke andre stader, seier Waterhouse som i dag jobbar som partnar i rådgjevingsselskapet Otte. Waterhouse viser blant anna til korleis KI har blitt brukt til å lese røntgenbilde på sjukehuset i Drammen. Dette har korta ned køane med over 100 dagar.

GURU: Torgeir Waterhouse under kurset hans om KI for tillitsvalde i Fagforbundet i mars. Waterhouse driv sjølv eit selskap der dei brukar KI for å sortere ut pukkellaks frå villaks i norske elver.

Øystein Windstad

• Ein av tre kommunar har brukt kunstig intelligens

– Viktig at vi heng med

Holmeide meiner at vi må ha eit opent sinn til KI på jobben:

– Den kunstige intelligensen er til hjelp, og det er ikkje slik at han får ta jobben vår. Vi må passe på rettane til folk. Samtidig kan vi ikkje stagnere og henge etter. Vi må gå vidare og henge med på dette som kan vere til stor hjelp, seier tillitsvalde Holmeide. I juni arrangerer Fagforbundet eit nytt KI-kurs for 300 tillitsvalde. Waterhouse seier at KI på jobben er komen for å bli og at fagforeiningane har ei vesentleg rolle i innføringa:

– Det viktigaste er at vi er gode til å gjere omstillingsprosessane på ein skikkeleg måte.

• Fagforbundet med nytt KI-kurs i juni